Hópur fólks úr ferðafélaginu Útivist, rösklega 20 manna hópur, gerði sér lítið fyrir og gekk á Heklutind um nýliðna helgi. Það tók hópinn 6 klst og 15 mínútur að ganga upp á toppinn og niður aftur, en gengið var frá bílastæðinu við Skjólkvíar.

Göngufólkið sagði að auðvelt hefði verið að ganga og þrátt fyrir að nokkur snjór  væri á leiðinni olli það ekki töfum eins og sést á tímalengdinni sem ferðalagið tók.

Þessi hópur vaskra Útivistarmanna lét því spár um yfirvofandi Heklugos ekki hræða sig frá göngu á fjallið fræga líkt og raunin var á um Ferðafélagsfólk um Jónsmessuna.

Útivistarfólkið kom að sjálfsögðu við í Heklusetrinu á Leirubakka bæði fyrir og eftir gönguna, skoðaði Heklusýninguna og fékk sér hressingu.

Myndin er tekin af hópnum fyrir utan Heklusetrið áður en lagt var í hann.